【名家給力場】美股、港股下半年齊衝高？

【Now財經台】以伊戰亂、關稅戰及俄烏戰事相繼惡化，雖然面臨呢3個重大不明朗因素，美股表現仍然硬淨，其中，標指更出現黃金交叉訊號，而每次出現呢個情況，美股都會輾轉向上，係咪意味美股有機會破頂？港股方面，恒生指數上半年曾突破24000關，下半年有冇機會再推高啲？

冠域商業及經濟研究中心主任關焯照指，自1980年以嚟，美股出現過14次大幅調整嘅熊市，每次喺低位反彈都出現20天線升穿200天線嘅情況，大市都錄得可觀升幅，甚至破頂，用黃金交叉計，每次最少升逾20%，最多更高達60%至70%，雖然依家離低位過千點，但根據過往經驗，相信美股仲有上望空間，破頂機會亦非常高，想打安全牌嘅投資者，可以選擇買交易所買賣基金(ETF)。

港股方面，關博士指，恒指依家已經喺23000點水平，認為上望空間唔大，雖然下半年應該可以爬返上24000至25000點，但要升上更高水平，就要有中央嘅新經濟政策推動。