【FINTERVIEW】美國「參戰」對美股有冇影響？(上)

【Now財經台】美國上周六(21日)出手打空襲伊朗3處核設施，伊朗受襲後揚言會報復，令中東緊張局勢再升級，不過，投資市場反應仍算冷靜，暫時僅油價飆升，金價及美元升幅唔大，美股期貨就跌唔夠1%。市場憧憬企業第2季業績及減息，睇好美股下半年走勢，加上中美關税戰緩和，點睇美股下半年走勢？

富邦銀行(香港)投資策略及研究部主管潘國光指，歐洲大部分國家嘅央行已經減息，美國亦兩度回購發債，美國財政部處於戒備狀態，只要債息有任何風吹草動，就會作相應部署，增加市場流動性，加上市場預期關稅戰會慢慢消退，暫時美國經濟只係輕微降溫，只要中東緊張局勢只係一個短期衝突，唔會擴大至地區性，甚至演變成全球戰爭，相信仍會有唔少資金趁低吸納，投資者維持審慎樂觀投資情緒之餘，亦要為中東局勢作對沖、避險部署。