【FINTERVIEW】美加未傾掂數美股下半年照升？(上)

【Now財經台】今日(30日)係6月最後一個交易日，投資者都準備做下半年部署，雖然傳出中美談判有進展，但另一方面亦傳嚟美加暫停貿易談判嘅消息，美國總統特朗普(Donald Trump)揚言要加徵加拿大關稅，目前，加拿大要為《美墨加協議》(USMCA)以外嘅輸美商品支付25%芬太尼(Fentanyl)關稅，以及50%鋼鋁及汽車關稅，貿易談判仍有唔少不確定性，不過，美股持續強勢，其中，標指上周五(27日)又破頂，係咪意味美國喺貿戰方面佔上風？點睇美股後市？

東亞證券高級投資策略師陳偉聰指，美國同加拿大嘅磨擦唔係一時三刻可以化解，但唔係冇得傾，只係雙方需時緩衝，亦要留意美國針對大部分國家嘅對等關稅(Reciprocal Tariffs)90日暫緩期，將會喺下周三(7月9日)屆滿，到時未必可以同所有貿易伙伴達成協議，但相信仍未傾掂數嘅國家，影響力都係較細，所以市場對貿易談判仍有憧憬，相佔美股仍會向好。

Jason又話，股份方面，傾向睇好美股嘅大型股份，尤其同資訊科技、人工智能(AI)等科技行業有關嘅股份，因為呢啲公司嘅企業盈利，一般都可以領先其他行業，所以睇高一線。