【now.com財經】有老友話近日銀行對於按揭貸款審慎，但並不樂觀，事緣是他的兒子最近買了一個自住單位，收入，貸款比率全部都合格，但銀行仍然唔批，搞到老友個仔好心煩。
老友可能唔知道，銀行唔係唔批，而是銀行知道老友個仔有一個有錢老豆，明明可以批都唔批，不過又唔係唔借錢，只不過要求老友替兒子簽份擔保，上午簽，下午就有錢用，使乜做按揭，俾風險管理部問到口啞，老實說，兩父子就冇得講，搵其他人簽擔保就很難，多年前我第一次買樓，銀行叫我搵一個有錢親戚簽份擔保，我話銀行借錢是做生意，可以唔借，但點解無端端要我欠親戚人情，錢債可以還，人情債難還，最後我轉去了一間外資行做按揭，利息仲平些少。
老豆簽擔保只是次好，最好是政府簽擔保，政府見市況唔係幾好，於是叫銀行借錢俾中小企，而且不是細數目，有3千幾億咁多，銀行借錢俾中小企，老實說，銀行連磚頭都唔借，又點會借錢俾你中小企，除非政府簽擔保，況且又是政府叫銀行做，政府冇理由唔簽，至於風險高唔高，根據疫情由政府擔保的貸款，大約有25%壞帳，3千幾億擔保，大約有800幾億壞帳，的士佬話對政府來說是濕濕碎。
由於中小企貸款有政府擔保，銀行乾手淨腳，更加冇興趣做物業按揭貸款，買了樓的人愈嚟愈難問銀行借錢，所以，打算買樓的人一定要清楚，就算收入足夠，借貸比率合格，銀行仍然唔係咁願意借錢俾人買樓，如果老馮以為銀行一定會借，咁樣很容易失了預算，無端端要撻訂。
