【期匯決算】金價或先下試3200美元

【Now財經台】國際金價今個星期一度衝上5周高位，現時喺每盎司3400美元水平有較大阻力，美國經濟數據堅韌，市場估計，美國聯儲局下周議息後將按兵不動，金價下周會唔會出現回套？

獨立商品外匯分析師熊俊傑指，金價依家處於較高水平，所以唔會特別睇好，3400美元水平已喺日線圖形成「4頂」形態，反映市場視呢個阻力為一個心理關卡，以技術形態嚟睇，能向上突破呢個位嘅機會唔大。

Ken又補充，美國已陸續同各國就對等關稅(Reciprocal Tariff)達成協議，估計下一個會係歐盟，如果呢啲較大嘅經濟體都可以傾掂數，相信市場嘅風險情緒會降溫，屆時對黃金嘅需求將會減少，事實上，各國央行買入黃金嘅消息愈來愈少，呢啲因素都不利金價向上突破，Ken估計，金價會先下試3200美元，下一站就會係3150美元。