【專家分析】儲能電池或成「寧王」新增長引擎

【Now財經台】寧德時代(02750)出咗第3季業績，期內多賺逾40%，收入按年增長近13%，突破逾千億人仔，毛利率就由第1季24.4%升至上季嘅25.8%，算唔算有驚喜？市場一直擔心上游行業「內捲」激烈，但睇返呢份成績表，似乎對寧德影響唔大？

天風國際李偉傑指，喺汽車市道維持正常增速下，寧德嘅第3季盈利及收入明顯改善，而股價今日(21日)表現，一度大升6%，高見560元，反映市場對呢份業績收貨。

毛利率方面，佢指出，江西礦場需要停工，令鋰電池價格一度急升，但對第3季毛利率及盈利增速冇太大影響，即使鋰電池價格上升，寧德仍然能維持盈利能力，股價將會逐步反映寧德嘅規模效應，令盈利有持續上升嘅動力。

Jason續指，儲能電池亦係其中1個增長亮點，有潛力成為繼電動車之後，另一個推動集團業務增長嘅重要動力。