【息賺】小心！派息基金恐賺息蝕價

【Now財經台】近期唔少銀行、保險公司及網上平台，都積極推廣唔同類型嘅每月派息基金，即基金公司用投資者嘅資金去投資唔同資產，如股票、債券或混合型資產等，亦可選擇投資唔同地區嘅市場，每個月都會按照既定息率除息，用現金形式派息予投資者，聲稱每個月可以派到5厘至8厘息，係咪真係咁著數？

資深財商顧問薛健鋒指，基金會確實每月都除息，雖然派息息率講明係非保證，但市場上嘅派息基金的確做到基金章程嘅承諾，即每月派到5%至8%息，帶嚟穩定收入，但始終係一項股票或債券嘅投資，自然有風險，派息基金價格會跟隨資產價格升跌，加上基金嘅投資收益要比承諾嘅派息比率高，先足夠比埋管理成本、銷售渠道利潤同佣金，舉例一隻承諾派8%息嘅基金，投資收益起碼要有10%以上，萬一市況差，投資虧損時，就可能令投資者賺息蝕價。因此，即使做到除息，亦無保證可以保本。