【Now財經台】中廣核礦業(01164)股價今日(23日)高開9%後，升幅一度擴大至逾13%，高見1.74元，暫時成交金額近2.9億元，成交股數較過去100日同時段增6倍。
美國總統特朗普(Donald Trump)今日(23日)稍後時間會簽同核、鈾相關嘅行政命令，受消息刺激，美國及亞太區核鈾相關股走強，帶起埋中廣核礦業，同系嘅中廣核電力(01816)及中廣核新能源(01811)都有得升，但升幅冇中廣核礦業咁勁，相信係因為公司係東亞唯一純鈾業上市公司。
中廣核礦業呢幾年生意做多咗，但盈利反而縮水，停咗派息幾年，去年先恢復派息，睇返上個月出嘅營運數據，首季實際產量較預期多約10%，計劃完成率110%，係咪意味公司有機會賺多咗，都要等出中期業績先知，今日似乎都係借消息炒作，最新已升至保歷加通道頂，出現明顯回套壓力。
