【Now財經台】港股嘅消費股喺過去一段時間表現搶鏡，「頂流IP股」泡泡瑪特(09992)股價過去1年累升近5倍，而唔少上市唔夠1年嘅消費股都表現強勢，其中，老鋪黃金(06181)現價較招股價飆逾20倍，茶飲股蜜雪集團(02097)、古茗(01364)及IP股布魯可(0325)，股價都倍升。雖然內地消費仍然疲弱，但對上述提及嘅消費股完全冇影響，點解讀呢個現象？
紅蟻資本投資總監李澤銘指，新消費股嘅共通點係股價表現特別好，反觀唔少傳統消費股表現特別差，相信主要有幾個原因，首先係投資者撤出傳統消費股，轉戰表現較好嘅新消費股，其次係表現突出嘅消費股，都係一啲上市時間較短嘅股份，當中有好多隻都未過半年禁售期，所以股份仲炒緊供求，繼而推高股價，佢認為，呢類股份喺「解禁」前仍相當安全，股價表現亦穩定。
Alan又話，新消費股有足夠嘅基本因素支持，例如銷售高增長，消費者忠誠度又較高，都會利好股價繼續上衝。此外，由於新消費股選擇唔多，亦係過去半年能夠跑贏大市其中1個主因。
