【Now財經台】周大福(01929)發行88億元、2030年到期嘅可換股債券(CB)，集團指，所得資金會用喺金飾業務發展及融資，係咪打算學老鋪黃金(06181)咁行「文化認同」及「身分體驗」路線？周大福股價今日(17日)一度低見12.4元，重挫近10%，依家係咪執平貨嘅好時機？
天風國際證券經紀業務部董事李偉傑指，周大福作為香港歷史悠久嘅金飾舖，工藝上係有能力做轉化，只係設計同品牌效應會唔會得到更高嘅市場期望，市場營銷上可唔可以進一步加強。佢認為，周大福嘅市場營銷額策略都係待變，因為過去本港嘅珠寶首飾都係以婚嫁同承傳為主，要喺突破點上揾新業務增長引擎。
Jason補充，喺發CB消息及金價顯著回落下，認為周大福股價短期都要捱一捱，呢隻強勢股喺10天及20天線會有較重要支撐，今日都考驗緊10天線。佢建議，冇貨嘅投資者喺近20天線，約11.8元至12.3元入場，因為防守能力較強。
