【Now財經台】截至早上11點，過去1小時內《彭博》用戶搜尋量最多港股，依次為同程旅行(00780)、泡泡瑪特(09992)、中國海洋石油(00883)、中芯國際(00981)、老鋪黃金(06181)。
旅遊出行股同程股價今日(19日)一度重挫逾9%，低見20.4元，同業攜程集團(09961)亦受壓，係表現最差藍籌，係咪被京東集團(09618)早前計劃進軍酒店及旅遊業務嚇親？市場似乎又會經歷一輪「內捲」，點睇同程前景？
紅蟻資本投資總監李澤銘指，呢啲互聯網平台一開始都係靠打價格戰，將資金實力較弱嘅對手踢走，但市場其實都相對穩定，可以保持一定利潤率，京東今次踩入嚟，無可避免會搶其他平台嘅份額，所以佢會提供更多優惠，例如減免商家應付佣金，或者向消費者提供補貼，從而累積商家同用戶人數，喺市場站穩腳步。
Alan又話，美團(03690)股價之前因京東加入打外賣戰而受壓，相信京東今次嘅行動，都會對同業造成衝擊，而同程股價好大機會成為早前嘅美團翻版。
