【Now財經台】莎莎國際(00178)今日(19日)中午出咗業績，全年少賺近65%，銷售成本只係減少8%，唔足以抵銷收入跌幅，本港零售環境差，收入跌都預咗，最大問題係成本控制似乎做得唔好，蝕得最甘嘅內地市場方面，公司計劃月底前關閉所有線下店，對整體經營有冇幫助？
耀才證券研究部總監植耀輝指，莎莎喺4月發過盈警，所以都預咗業績唔好，但成本其實都好難再壓縮，始終集團有實體舖面，舖面所需資金好難大減，當生意差嘅時候，成本睇落就相應高咗。
Stanley又話，莎莎全關內地門店係合理，但莎莎北上發展多年，成績始終唔係太好，加上依家內地競爭愈來愈激烈，關店似係係一個無奈嘅決定。另一方面，莎莎線上銷售唔算標青，而內地唔少品牌都有自家電商業務，加上有唔少新品牌崛起，經營環境變化較大，所以線上業務都唔會有太大憧憬。
