【Now財經台】截至早上11點，過去1小時內《彭博》用戶搜尋量最多港股，依次為中國宏橋(01378)、小米集團(01810)、中國平安(02318)、創科實業(00669)及泡泡瑪特(09992)。
宏橋昨日(23日)收市後發盈喜，預告中期多賺35%至約124億人仔，摩根士丹利指，盈喜好過該行預期，並估計鋁價下半年會繼續喺高位浮動，料宏橋下半年業績可以保持平穩。宏橋股價今日(24日)破頂，早市一度大升8%，高見17.28元，值唔值得高追？
宏高證券董事梁杰文指，宏橋發盈喜係預期之內，但無諗過咁早發，市場一定會收貨，加上市場估計鋁價會持續高企，而喺原材料供過於求下，公司可以壓低成本，所以毛利率有擴闊空間。
Mike補充，集團去年多賺1倍，但喺高基數效應下，預期今年增速將會放慢，但佢認為，股價短期仍有上升動力，冇貨要考慮係咪有需要高追。
