【Now財經台】英皇國際(00163)上周五(27日)出咗全年業績，勁蝕逾47億元，值得留意係，集團有166億元銀行貸款已經逾期，有機會被銀行要求立即還款。睇返公司通告，英皇國際有可能會出售投資物業還錢，如果真係用呢個方案，救唔救到公司？
《香港股票財技密碼》作者梁杰文指，睇返公司年報，英皇揸住唔少優質商廈及地舖，依家面對債務違約，相信集團未來要出售呢啲優質資產套現解決問題。
Mike又話，依家香港市道呈兩極化，雖然本港經濟開始回穩，但物業估值仍然低殘，加上英皇系內及其他中小型發展商都面臨同樣問題，喺各方急於沽貨套現下，較難賣到一個靚價。
佢補充，變賣資產能唔能夠幫到公司過到呢一關，仍然好視乎本港經濟前景及息口走勢，近年美國息口向上，令本港商廈及地舖市場一直冇起色，雖然睇得出集團有誠意解決問題，無奈市道跌得太急，公司錯過咗最佳沽貨時機，相信要較大折讓先可以成功沽貨套現。
