【Now財經台】太古地產(01972)表示，近期上海商場項目人流或零售銷售均錄得雙位數增長，集團表示，會發展其他二線城市項目。
中央近期連串提振消費專項活動，以及「以舊換新」政策令零售市道回暖。
由太古地產及香港興業(00480)合作發展，位於上海靜安區興業太古滙的新地標「路易號」落成。
太古地產指出，看到商場項目零售銷售錄得雙位數增長。
太古地產零售業務董事韓置說:「 尤其是進入咗2025年，零售氣氛係非常非常好，無論人流或銷售方面，我諗大家有睇過我哋第1季度(零售)嘅數字，其實都有正面嘅表現，政府經濟刺激個package，我哋見到個效用係出緊嚟，去年10月宣布第1次，數落嚟大約半年時間，通常需要一段時間落返嚟。」
集團又認為，零售表現是取決於商場能否帶來創新顧客體驗及消費場景。
韓置說:「我哋特別強調社區營造，無論喺邊個地方，當我哋考慮布置投資時，唔止睇嗰個投資，或只睇單一商業成功與否咁簡單，更重要係睇成個板塊及地區，整體點去做社區營造，點樣幫到區政府或市政府，又或者當地一啲持分者大家一齊共贏，過程中我哋希望做到，可以將國際資源全部拉過嚟，去到一個地區或我哋嘅項目，進行深度合作及融合，從而希望產生到一啲新內容。」
太古地產內地業務主要集中於一線城市發展。
韓置說:「從零售角度睇，我哋去睇地方時，都希望嗰個地方有基本面，基本上無論GDP，無論人口及消費觀，需要能夠做到一啲好嘅零售，我哋先會去布置(商場項目)。」
集團續稱，內地一線城市經濟發展有利零售業務增長，但亦看好二線城市的發展潛力，集團位於廣州、西安及三亞
的「太古里」項目未來將會相繼落成。
