【Now財經台】奈雪的茶(02150)今日(2日)傳嚟一個好消息，集團喺投資者交流會提及，今年5月門店平均定單量按年增長35%，同店定單量增長28%，去到6月仍保持到呢個增長勢頭，平均定單量增長26%，假期期間多家門店定單量更飆近5倍，奈雪股價今日一度高見1.81元，勁升逾43%。經營層面有好消息，係咪代表經營前景好轉，點睇呢啲數據？
元宇證券基金投資總監林嘉麒指，其實同店平均銷售量及實質收入係有差別，因為大部分茶飲公司比到嘅數都係賣幾多杯，但賣幾多錢或有冇涉及補貼，市場其實都唔清楚，當然，市場或會因為銷售數據，對未來收入及盈利有憧憬，但喺內地茶飲店有「內捲」情況下，銷售量上升係咪可以改善財務狀況，仍然係未知之數。
KK續指，銷售上升或涉及外賣平台、促銷優惠或提供補貼等，可能係一個短期現象，所以持續性及未來收入變化都好重要。佢又補充，呢啲數據初步可視為好消息，但公司盤數實質上係咪都靚咗仍要觀察。
