【Now財經台】截至早上11時止，1小時內《彭博》搜尋量最多港股，依次為九龍倉置業(01997)、小米集團(01810)、美團(03690)、金山軟件(03888)及信達生物(01801)。
本港5月零售銷售爆冷扭轉14個月跌勢，市場原本預期繼續跌，係去年2月以來首次有得升。摩根大通隨即轉軚，將收租股九置評級由「減持」調高至「增持」，目標價更大幅調高逾60%至27.5元，九置股價今日(3日)高開近2%後，升幅一度擴大至近10%，高見24.7元，本港零售業係咪已經見底，還是只係回穩？
椽盛資本投資總監曾永堅指，雖然5月零售銷售數據有驚喜，但仍未可以斷言已見底，未來仍要睇埋旅客來港嘅消費情況。佢又話，九置旗下商場主打高消費，好視乎旅客增長及消費意欲，先可以評估到租金及續租係咪可以受惠。至於股價今日大升，市場似乎係炒作長遠預期或市場心態轉變。
Jasper又話，要留意九置嘅資產淨值(NAV)折讓較大，依家股價折讓逾50%，但股價喺4月由16元水平起步，升至現水平，已累升約50%，九置財務狀況較健康，防守能力亦較強，股價未來可唔可以繼續向上，就要睇短期可唔可以企穩24元。
