【Now財經台】截至早上11時止，過去1小時內《彭博》用戶搜尋量最多港股，依次為聯想集團(00992)、地平線機器人(09660)、騰訊控股(00700)、領展房產基金(00823)、新秀麗(01910)。
聯想今早(14日)開市前出咗業績，但股價今日逆市跌，中午收市跌逾3%，報11.11元，集團上季純利翻倍至5.37億美元，但收入僅按年增長約20%，毛利率亦收窄，撇除一次性收益，經調整淨利潤按年僅增長22%，點睇呢份成績表？
椽盛資本投資總監曾永堅指，扣除一次性及非現金項目，聯想實際表現較市場預期差，整體毛利率收縮，市場亦關注聯想主要業務板塊，會唔會持續面對市場競爭壓力，加上中美經貿角力持續，雖然聯想美國市場比重近年下降，但相關風險仍備受關注。
Jaseper又話，市場期待人工智能(AI)熱潮能令內地企業加大伺服器等硬件投資，帶動相關收入，但現時收益情況冇預期咁強勁。此外，聯想股價早前已累積一定升幅，加上依家面對嘅多項因素，短線需時消化回套壓力。
