【Now財經台】截至早上11時止，過去1小時內《彭博》搜尋量最多港股，依次為商湯(00020)，華潤萬象生活(01209)，中國平安(02318)，農夫山泉(09633)及康方生物(09926)。
商湯股價近期強勢，集團業績亦有改善，由前年蝕逾60億元，收窄至去年蝕逾40億元，《彭博》最新預測商湯今年虧損最多收窄至逾20億元，半年則蝕逾10億元。點睇商湯前景？
資深證券分析師彭偉新指，商湯虧損不斷收窄，意味公司成本控制能力及集資能力有改善，不過，商湯由虧蝕到可以達至收支平衡所需要嘅時間，較公司最初提出嘅時間長，其中一個主因係集團創始人湯曉鷗離世，令產品推出及模型更新推遲。
不過，跟人工智能(AI)相關嘅行業唔可以用太長時間扭虧為盈，因為AI行業有壟斷問題，頭兩個最大營運商佔整體市場份額90%至95%，呢個絕對唔係好事，尤其今年2月DeepSeek爆紅後，對商湯構成好大挑戰，雖然公司努力扭虧，但現時整體挑戰及阻力卻愈來愈大，令扭虧時間進一步推遲。
Castor又話，商湯股價上升係因為内地支持與AI相關嘅政策,令商湯升穿5月1.92元嘅高位。
