【Now財經台】截至早上11時止，1小時內《彭博》搜尋量最多港股，依次為山高控股(00412)、銀河娛樂(00027)、金沙中國(01928)、小米集團(01810)及安踏體育(02020)。
山高股價今日(19日)一度暴瀉63%，低見5.18元，相信同公司被證監會「點名」，指公司股權高度集中有關，2名主要股東已合共持有逾68%股權，而另外20名股東就持有24%，即街貨只有逾7.5%，貨源極度歸邊，股價今日插水咪都預咗？點睇山高後市？
大華繼顯執行董事梁偉源指，股權集中嘅股份必須小心，山高今年4月由6元水平起步，一度升至19元水平，由於貨源極度歸邊，即使好少人沽貨，都足以將股價推到好低，股價依家只係打回原形。
佢又話，睇返山高嘅股權分布，反映股價好受人為因素影響，當少數人一齊沽貨時，有可能觸發其他人掟貨，亦解釋咗今日股價急瀉之餘，點解成交亦比平時多。
