【Now財經台】恒生銀行(00011)股價今日(26日)午後突然衝高，一度高見123.8元，大升8%，創52周新高，據《彭博》昨日(25日)報道，滙豐控股(00005)要求恒生出售本港房地產不良貸款，包括英皇國際(00163)及大鴻輝興業等，涉及逾30億美元嘅房地產抵押組合，但現時仍處於出售初步階段，消息傳出後，恒生股價昨日(25日)收市跌3%，其實盡快拆呢個商業房地產債務炸彈，理應係好事，但點解股價昨日仍要跌？
紅蟻資本投資總監李澤銘指，呢個出售決定是好是壞，仍要視乎恒生之後不良貸款剩返幾多，始終出售不良貸款一般都會大打折扣，好難用原有貸款額賣出，加上出售後業績會出現撇帳，造成較明顯虧損，影響一級資本比率，因此，股價昨日向下係合理。佢又話，恒生股價今日突然抽升，暫時仍未見有重大利好消息傳出，仍要觀察。
Alan又話，雖然出售不良貸款可以減輕債務負擔，但仍要面對減息、撇帳等問題，但如果唔賣，由於本港樓市唔樂觀，恒生不良貸款比例有機會繼續上升，所以賣或唔賣都有唔少問題要面對，最終就要視乎恒生取態。
