【Now財經台】截至早上11時止，1小時內《彭博》用戶搜尋量最多港股，依次為遠東發展(00035)、銀河娛樂(00027)、金沙中國(01928)、華虹半導體(01347)及美高梅中國(02282)。
華虹股價近期升勢凌厲，今早(6日)又破頂，同業中芯國際(00981)亦創新高，但中芯觸及90元關口後，曾仲短暫倒跌，之後再發力上衝，迫近93元關口，高盛再上調中芯目標價，最新睇95元，華虹就睇87元，後者上星期已經到價。值得留意係，近日市傳有研究機構發現華為嘅頂級人工智能(AI)晶片，用咗台積電(TSMC)、三星(Samsung)及SK海力士組件，晶片股升勢會唔會受影響？
富昌證券聯席董事譚朗蔚指，晶片股今輪升浪主要由市場情緒主導，兩家晶片巨頭業務上冇乜變化，但要留意兩隻股份依家已經十分超買，成交能唔能夠配係十分重要，以華虹為例，14天相對強弱指數(RSI)升到89，係約3年以來最高水平，中芯亦已非常超買，佢認為，等股價回落至約77元，先係較合理嘅買入水平，又話現價高追風險大過回報。
Stevan又話，華為呢單消息或會影響市場信心，對國產晶片係咪完全國產、合唔合規都有疑慮，未來要繼續關注後續消息，始終晶片股炒作已超越基本面，投資者要更加小心。
