【Now財經台】美股業績期持續，今個星期輪到Netflix、Tesla、英特爾(Intel)及可口可樂(Coca-Cola)等派成績表外，亦有多家小型銀行放榜，市場焦點係咪繼續落喺地區性銀行嘅信貸問題？
星展銀行(香港)的鄧威信認為，美國嘅銀行業績近期對市場帶來震盪，而投資者可能因為擔心地區性銀行壞帳，傾向沽貨避險，佢提醒，喺搞清楚壞帳係個別事件，還是整個行業都受影響前，投資者更應留意小型銀行嘅業績，以了解行業現時嘅情況。
Wilson又話，科技股已累積唔少升幅，呢類公司嘅盈利要持續增長，先可以支撐到高估值，所以都要留意科技股業績。佢又提及，英偉達(Nvidia)行政總裁黃仁勳日前話，集團晶片喺中國市佔率已由95%變為0%，其實只係比說話美國總統特朗普(Donald Trump)聽，希望佢知道美國放棄中國市場係唔明智。
