【Now財經台】據Counterpoint Research統計顯示，美國及內地市場iPhone17首10日銷量，較去年同期嘅iPhone16高出14%，其中，以基本版及Pro增長最大，銷情好過預期，消息刺激蘋果公司(Apple Inc.)股價創新高，突破260美元，但今年以來，Apple股價僅累升約5%，大幅跑輸大市，如果現價追入仲有幾多上望空間？
易方資本副基金經理王逸研認為，iPhone17始終只係「過渡年」，市場關注點依然係iPhone18，但要等明年3月至4月先會有更多消息。
佢續指，硬件方面，除iPhone、Mac及iPad，軟件如Apple Intelligence進展唔大，雖然Apple最近多咗用「張量處理器」(TPU)去做未來嘅雲訓練，但係Apple發展始終比較落後，加上人工智能(AI)方面暫時較難有新突破，所以佢認為相於Apple，AI半導體或AI硬件相關股份更吸引。
