【專家分析】國泰君安呢浸炒作只係「虛」火？

【Now財經台】國泰君安國際(01788)昨日(25日)表示，獲證監會批准將現有1號牌升級，變相可以提供虛擬資產交易服務，股份昨日成交金額高達163億元，係最活躍港股，北水淨流入近17億元，股價今日(26日)早段一度再抽升，但午後要跌，點睇今輪炒作？

胤源世創家族辦公室(香港)第一副總裁黃偉豪指，升級1號牌後，理論上提供多一個新服務係有利公司業務發展，而虛擬資產係近期焦點，集團亦可以話係首家獲准升級1號牌嘅上市中資券商，相信會有正面影響。此外，有內媒話，國泰君安有咗呢個牌之後，有埋穩定幣概念，所以炒得更癲，但Ravi指，必需釐清呢兩個係唔同嘅牌照，升級1號牌後只係可以提供相關服務，唔係可以自己發幣。

Ravi又認為，今次比較似炒作，雖然中長線嚟講，市場對呢類業務睇法愈來愈正面，憧憬增長空間，但依家仍處於起步階段，國泰君安開展新業務後，受惠程度到底有幾大仲係未知之數，相信資金係偏向短炒。