【專家分析】點解老鋪黃金「解禁」照破頂？

【Now財經台】老鋪黃金(06181)上周六(28日)剛上市滿1年，市場原本擔心會有大批「解禁股」出籠，令股價捱沽，但股價今日(30日)不跌反升，仲要破埋頂，一度勁升18%，高見1035元，到底係咩原因升得咁勁？

博威環球證券金融首席分析師聶振邦指，可以將「解禁」嘅約8000萬股分為3部分，分別係基石投資者、上市前股東及上市前投資者，當中，佔最大份額係上市前股東，合共持有約5500萬股，大部分由公司管理層或執董持有，呢類股東沽貨意欲低，換言之，僅約2400萬股有沽貨壓力，所以沽壓冇市場想像中咁大。

聶Sir又指，老鋪黃金今日暫時成交股數逾350萬股，對比撇除大股東持股後嘅「解禁股」唔算多，反映不論係基石投資者，還是上市前投資者，沽貨誘因都唔大，相信係因為投資者對未來金價有信心，加上有好多散戶投資者睇好後市，喺資金持續流入下，沽盤都一直有承接，所以推高股價。