【Now財經台】截至早上11時止，1小時內《彭博》用戶關注度上升最多港股，依次為老鋪黃金(06181)、IFBH(06603)、泡泡瑪特(09992)、中芯國際(00981)、小米集團(01810)。
今日(30日)新消費股表現強勢，老鋪黃金上周六(28日)剛剛上市滿1年，意味上市前投資者嘅股份「解禁」，股價今日未受影響之餘，更創新高，中午收市報1019元，大升16%，可能因為解禁壓力冇預期咁大，因為大股東徐家明家族承諾完成配股後，將解禁期延長90日，即8月15日先至「解禁」，雖然其他上市前投資者已經可以沽貨，但大股東延長解禁期，「解禁」壓力會比預期細好多，老鋪黃金現價仲值唔值博？
大華繼顯執行董事梁偉源指，對持有IPO貨嘅投資者嚟講，現價有好大沽貨獲利誘因，集團嘅黃金業務擴至海外亦做得好好，市場對2024至2025財年收入增長有憧憬，市盈率(PE)有望升至約20倍。
Steven又話，海外業務似乎係公司未來重點發展方向，亦可能成為主要收入來源，所以資金都唔急於沽貨，但股價短時間內升得太急太多，不妨等股價略為回落再入手。
