【Now財經台】過去大半年，生物製藥及創新藥相關股份嘅投資氣氛明顯改善，有「藥中茅台」之稱，市值超過3000億人仔，內地創新型藥廠恒瑞醫藥(01276)今日(23日)首掛，藥股應該點揀好？
紅蟻資本投資總監李澤銘指，之前行業較低迷時，唔少藥股都偏向低產，就算有好多18A公司上市，藥物研發方面都冇突破性進展，繼而打擊投資氣氛，但隨著市場慢慢篩選，就有啲公司跑出，研發亦有進展，而當藥物上市後，公司盈利增長顯著，比到投資者信心。佢又話，早年嘅集中採購政策嚴重打擊傳統藥企盈利，呢個會反映喺估值及營運上，依家「可以留低」嘅藥廠，收入及盈利都有保證。
Alan又指，藥股可以留意一啲交到成績嘅公司，或者藥物研發有進展嘅藥企。此外，可留意有國際藥廠加持嘅藥股，除咗公司有收入，投資者對呢啲公司嘅研發能力會更有信心，股價表現可睇高一線。
