【Now財經台】港股近日似乎炒股唔炒市，香港中旅(00308)、大家樂(00341)、九毛九(09922)等多隻股份，突然異動，甚至觸發市場調節機制，呢啲異動股都有一個「特徵」，就係大部分喺午市於大成交配合下突然抽升，但收市時升幅「縮水」，呢個現象係咪反映港股已A股化？呢啲異動股來自唔同板塊，勉強可以歸類為旅遊飲餐食及券商股，其實有冇路捉？
紅蟻資本投資總監李澤銘指，港股通南向資金佔嘅成交多，港股A股化係無可避免，但另一方面，A股亦出現變化，由之前散戶主導，變得更加大戶化，更貼近港股嘅情況，而大部分出現炒作嘅股份，都係大型高息股、公用股，加上呢啲股份本身較「乾」，一有大型資金進場就好容易炒起。
不過，Alan指出，呢類炒作一般都係靠消息炒起連相關股份，由於升勢太急，散戶好難捕捉入手時機。
