【Now財經台】金蝶國際(00268)昨晚(11日)出咗中期業績，股價今日(12日)急挫，一度大跌8.5%，係表現最弱勢科指成分股。集團中期虧損大幅收窄55%，收入按年增長11%，毛利率擴大2.4個百分點，摩根大通指，金蝶呢份業績係近兩年以來首次好過預期，但點解股價跌到咁，市場收唔收貨？管理層指，今年會強攻東南亞、中東市場，未來人工智能(AI)業務發展及「出海」步伐係咪有望加快？
信達國際研究部董事趙晞文指，市場對金蝶業績反應兩極係正常，如果單睇虧損，係比市場預期大，但銷售成本按年升幅大過收入增幅，毛利率又升，反映經營狀況有改善。不過，市場關注雲業務扭虧為盈嘅情況，今次業績就畀唔到市場信心。佢認為，下半年市場焦點會放喺金蝶點樣提升收入增速，釋放經營槓桿。
晞文續指，金蝶開拓海外業務可以增加公司優勢，但要面對燒錢問題，短期內對毛利率貢獻有限。佢又認為，金蝶AI收入佔比要去到30%嘅目標水平，可能需要更多時間先可以達標。
