【Now財經台】茶飲股古茗(01364)昨日(26日)收市後派咗成績表，半年多賺逾1倍，毛利率逾31%，同業蜜雪集團(02097)今日(27日)中午都出咗中期業績，盈利按年增長43%，毛利率逾31%。點睇呢兩份業績？如果投資者要二揀一，應該點揀好？
元宇證券基金投資總監林嘉麒指，單睇大數古茗表現較好，雖然古茗嘅高速增長已開始慢慢放緩，但仍維持唔錯嘅增長，相比蜜雪，古茗產品單價及整體服務費收入較高，所以古茗股價反彈動力會大啲。
股價方面，KK又指，古茗及蜜雪最大分別為解禁期對佢哋嘅影響，古茗已經解禁，股價亦已經跌咗落去，但蜜雪就快解禁，所以仲未見到相關影響。佢又話，今年幾隻大型新股如毛戈平(01318)及老鋪黃金(06181)，股價喺解禁後都要跌，估計蜜雪有機會出現相同情況，所以現價來講古茗會較吸引。
