【Now財經台】美的集團(00300)及海爾智家(06690)早前已派咗中期成績表，股價喺放榜後都造好，反映市場都收貨，呢兩份家電股業績邊份較好？下半年邊家可以睇高一線？
天風國際李偉傑認為，美的收入及盈利表現較好，收入及純利分別增長15.7%和25%，雖然海爾盈利創新高，但增速不及美的。毛利率方面，美的跌至25.5%，海爾就升至26.4%。整體來説，美的盈利表現較好，但如果計埋市盈率(PE)及派息水平，海爾估值較理想。
Jason又指，海爾海外業務收入佔比較美的高，而海爾嘅海外業務收入佔整體50%，美的則佔40%，但佔比高唔一定好事，例如關稅題會帶嚟好多不確定性，不過，海外收入佔比愈高，毛利表現就會愈好，係有辣有唔辣。
股價方面，佢就指出，美的股價喺爆發貿易戰前，處於71元水平，現時約86元，但海爾現價同貿易戰開打前差唔多，由於中美貿易戰依家已降溫，所以海爾追落後空間較大，不過，由於集團冇機械人等當時得令嘅業務，市場憧憬會較小。
