【now.com財經】蘋果公司(Apple Inc.)已經喺今日(10日)凌晨1點開咗秋季發布會，iPhone 17系列、新Apple Watch等新產品齊齊亮相，包括sell「輕」及「薄」嘅「新成員」iPhone 17 Air。不過，外界好關注嘅人工智能(AI)就繼續冇影。今次iPhone 17系列最有話題唔係有咩新function，而係一個新顏色，仲喺social media爆紅。
iPhone17 Pro及Pro Max有3隻新顏色，分別係深墨藍、宇宙橙及銀，其中，宇宙橙成功「跑出」喺Threads引起熱烈討論，因為網民覺得呢隻橙色同大快活集團(00052)嘅官方橙色好相似，亦有網民覺得同星級名牌Hermes嘅橙色相似。
有打算換機嘅市民話，不論係「高貴嘅Hermes橙」或「平民嘅大快活橙」，都接受唔到咁sharp嘅顏色，都係會揀返穩陣及襟睇嘅顏色。
「大快活橙」新iPhone爆紅，大快活股價今朝(10日)都有得升，一度高見5.58元，升1.6%。
