【now.com財經】近期幾乎每日都出現一啲股價突然狂飆或暴瀉股，又或者「過山車股」，引起市場關注及討論。股價今年一度累升近2倍，周二(16日)突然喺高位「跳水」急插嘅山高控股(00412)，最新遭證監會「點名」，指集團股權高度集中。山高股價今朝(19日)低開近15%後，跌幅一度擴大至逾57%，低見5.98元，暫時成交金額逾7.4億元。
證監指出，山高2名主要股東已合共持有逾68%股權，而另外20名股東就持有24%，即街貨只有逾7.5%，而兩名大股東分別係有省國資委背景嘅山東高速集團，同埋嘉實國際資產管理旗下JS High Speed Limited。
此外，集團喺周二股價急瀉後，同日就宣布計劃最多動用1億美元，折合約7.8億港元，喺股價唔高過17元下，回購公司股份。
