【股市脈搏】山高控股仲有彈藥自救？

【Now財經台】山高控股(00412)股價今早(23日)輕微低開後，走勢同大市背馳，最多升近30%，高見5.65元，成交股數較過去100日同時段平均大增35倍。

山高上周五(19日)被證監會點名後，股價單日暴瀉76%，但過去兩日因為獲北水增持，公司又喺場內回購股份，股價累計反彈58%，而北水繼續撐高山，喺上周五(19日)及今日合共淨買入逾26億元。

集團出手回購370萬股，其實喺山高於股價暴跌前，董事會已攞咗授權，可以回購最多1億美元股份，預示嚟緊仍有彈藥去維穩。