【Now財經台】內地上周四(9日)發布有關稀土出口管制公告時，被發現附件檔案格式首次使用國產，來自金山軟件(03888)WPS格式，而非微軟WORD或者Adobe嘅PDF，引起外界熱烈討論，金山股價今日(13日)一度勁升近19%，高見38.2元，係咪同呢單消息有關？
博威環球證券金融首席分析師聶振邦認為，金山股價今日除受利好消息帶動，亦因為恒生指數急瀉，令部分資金轉投金山推升股價。佢相信，商務部傾向用國產文書處理軟件，但由於選擇唔多，而金山普及性較強，所以選用金山係可以理解。
聶Sir又認為，金山6億用戶中，僅逾4000萬屬於付費用戶，雖然政府認可對金山嘅付費服務提價能力有間接幫助，但如果政府使用後，只使用免費功能而冇付費安排，金山嘅潛在增長空間就未必好大。
