【now.com財經】新股機制革後，散戶想靠抽新股賺錢，似乎少啲運氣都唔得，更有網民指「難過中六合彩」，就算「頭槌飛」都唔一定穩中，主要係中籤率極低。另一方面，新股首掛「倍倍聲咁升」嘅情況近期明顯少咗，雖然大部分首掛仍可「打響頭炮」，但可能一手只賺到幾百蚊，食唔到大茶飯，轉吼半新股可能係另一個出路。
以由四環醫藥(00460)分拆出嚟，內地生物製藥公司軒竹生物(02575)為例，股份喺上周三(15日)首掛，今日(22日)上市第6日，股價一直向上，若以今日即市高位60.2元計，較招股價11.6元，累升逾4倍，如果IPO貨喺今日高位沽出，一手勁賺逾24000元。
其實集團最新都有利好消息，就係創新藥「吡洛西利」晚期乳腺癌3期數據亮麗靚，刺激股價今日一度飆逾32%，突破60元關口。
