【now.com.財經】本港IPO市場持續熾熱，鍾意抽新股嘅散戶選擇多，當中有唔少具名氣或巨無霸公司，呢啲股份上市後，表現普遍都算穩定，股價亦冇特別走樣，而「半新股四王」之中，暫時以昨日(19日)掛牌，內地「醬油王」海天味業(03288)表現較失色。
海天昨日登場，相信唔少捧場客都一額汗，股價一度「潛水」，收市總算頂得住唔使「破發」收場，今日(20日)第2日掛牌，仍然冇起色，股價反覆向下，曾經觸及招股價36.3元。
海天上市表現唔好，其實可能都有跡可尋，首先海天A股今年表現一般，今年以嚟暫時累跌逾10%，過去1個月就累跌唔夠10%，成交亦唔活躍，其次係市盈率(PE)唔低，同埋呢類有A股做參考價嘅股份，要大升一向唔易。
再幫另外「三王」計一計數，即「寧王」寧德時代(03750)、「雪王」蜜雪冰城母公司蜜雪集團(02097)、「藥王」恒瑞醫藥(01276)，如果IPO貨仍未沽出，依家仍有錢賺，暫時最賺錢係早前香港有分店爆出食安風波嘅「雪王」。
蜜雪集團最新報505.5元，升2.3%，以現價計，至今較招股價202.5元，累升近1.5倍。
恒瑞醫藥最新報57.3元，升0.7%，以現價計，至今較招股價44.05元，累升30%。
寧德時代最新報299.8元，升0.4%，以現價計，至今較招股價263元，累升近14%。
