【Now財經台】希慎興業(00014)今日(14日)中午派咗成績表，上半年收入按年增長2%，經常性基本溢利10.3億元，計及物業公允值變動嘅純利按年大跌82%，但派息維持0.27元，呢份成績表收唔收貨？租金收入中，佔比最大嘅商舖收入按年增長2%，點睇下半年零售商舖復甦步伐？
耀才證券研究部總監植耀輝指，希慎撇除公允值變動後，經常性基本溢利仍按年升1.2%，表現算收貨，依家大環境比較艱難，市場對呢類收租股期望唔高，所以希慎仍有增長都算有少少驚喜，加上維持派息，息率都有約6.8厘，所以整體表現都收貨。
Stanley又話，下半年市道仍有唔少變數，舖租壓力持續，雖然舉辦唔同嘅大型活動，可能對氣氛或個別零售銷情有幫助，但始終大環境唔係咁理想，所以好視乎商舖及地段有冇競爭力，現時希慎出租率跑贏同業之餘，租金仍有少少上調空間，佢估計，希慎下半年表現唔會太差。
