【Now財經台】內地4S龍頭汽車經銷商中升控股(00881)今日(28日)中午出咗上半年業績，收入按年跌6%，純利就按年跌36%。期內，汽車銷售收入按年跌7.4%，新車銷量跌1.7%，二手車銷量就跌9.6%。股價午後一度急挫逾8%。內地車企去年開始已蝕住賣車，尤其新車，就算車廠加大補貼，但仍要蝕錢，到底車企幾時先可以做到「賣到車又賺到錢」？
艾德金融執行董事陳政深估計，暫時較難做到，中央今年6月就「內捲式」競爭約談內地車企，但其實車企都係聽完就算，又或者只係改變「捲」嘅方式，導致內地汽車平均售價普遍下跌，尤其係電動汽車，包括電動汽車龍頭比亞迪股份(01211)，所以好難期望汽車分銷商如中升嘅毛利率可以回升。
佢又話，中升賣嘅車大部分唔係純電動車，但純電動車喺內地較好賣，以往較高消費力嘅客群轉買貴價電動車，但呢類品牌競爭好大，又唔可以直接減價，唯有提供更多優惠，例如回贈等，而呢啲都係銷售成本，繼而拖累毛利率。
