【Now財經台】截至早上11時止，1小時內《彭博》用戶搜尋量最多港股，依次為東風集團股份(00489)、比亞迪股份(01211)、快手(01024)、紫金黃金國際(02259)及哈爾濱電氣(01133)。
東風集團昨日(2日)已向聯交所提交旗下嵐圖汽車以介紹形式上市嘅申請，嵐圖成立於2021年，定位高端新能源汽車，定價20萬至50萬元人民幣，今年首7個月銷量共6.66萬架，只係等如新勢力零跑汽車(09863)1個月嘅銷量，點解交付量會有咁大落差？作為國企，造車係咪會有優勢？
大華繼顯執行董事梁偉源指，嵐圖市場定位係高端品牌，所以每個月銷量唔會太多，始終係新品牌，首7個月交付量都見唔到好大增長動力。
Steven又話，下半年開始7月至9月整個新能源汽車市場「內捲」情況加劇，個別公司9月同比銷售開始有下跌情況，嵐圖嘅經營數據未反映到最新市場競爭情況，就算有利好消息，投資者要留意內地電動車市場「內捲」情況有冇紓緩跡象。
