【Now財經台】截至早上11時止，1小時內《彭博》搜尋量最多港股，依次為快手(01024)、泡泡瑪特(POP MART)(09992)、小米集團(01810)、比亞迪股份(01211)及領展房產基金(00823)。
小米首季業績一如預期靚仔，收入按年增長47%至1113億人仔，經調整多賺64%至107億人仔，毛利率微升至22.8%，齊創新高。小米股價已自4月低位回升咗唔少，係咪已price in晒呢啲利好因素？係咪要等首款SUV車YU7及自主研發設計嘅3納米晶片「玄戒O1」推出及正式應用後，股價先有動力繼續向上？
資深證券分析師彭偉新指，YU7肯定係一大賣點，集團亦提及唔會減價促銷，所以投資者唔需要擔心毛利率受壓，而早前發生嘅交通意外對SU7銷量冇太大影響，亦可維持增長。
Castor續指，晶片設計公司Arm祝賀小米自主研發新晶片，亦表示會支持小米新晶片，對小米日後推新手機有好大作用。佢認為，小米股價暫時冇向上突破嘅動力，相信要等新電動車及新手機推出後，再睇下市場嘅反應。
