【Now財經台】截至早上11時止，1小時內《彭博》用戶關注度上升最多全球股票，依次為友邦保險(01299)、阿里健康(00241)、中芯國際(00981)、康方生物(09926)及美團(03690)。
友邦今日(4日)開市前有4宗大手上板，合共涉及268億元，平均每股成交價68元，較昨日(3日)收市價低約6%，友邦股價今日顯著受壓，一度低見68.6元，跌逾5%。市場預期，年底前美國將會減息兩次，連同美國10年期債息向下，可能有利友邦新業務價值及內涵值，投資者應唔應該趁低吸納？
大華繼顯執行董事梁偉源指，呢批股份涉及3.94億股，佔已發行股本3.7%，友邦到依家都冇出通告，估計呢批股份唔係配新股，亦唔似係現有主要投資者減持，佢提醒，友邦主要由機構投資者持股，可能係機構投資者旗下唔同嘅基金進行買賣，所以要上返板。
Steven續指，友邦基本面冇出現改變，加上大市場認為美國下半年會減息，會有利對金融、保險股估值，投資者可以考慮趁股價今日跌到68元至69元小注吸納，博受惠於美國減息。
