【Now財經台】華潤啤酒(00291)今日(19日)中午交咗一份靚業績，上半年盈利及毛利率齊創新高，中期息又加碼逾24%，刺激股價午後一度急升逾7%，高見28.66元，除咗業績靚，國務院總理李強表示，要做強國內大循環，持續激發消費潛力，喺呢啲利好因素下，潤啤上望空間仲有幾多？
博威環球證券金融首席分析師聶振邦指，雖然潤啤業績好，加上中央表明要繼續力谷消費，令市場憧憬或會再出招刺激消費，但值得留意係，潤啤股價曾經喺3月升穿31元，但企唔穩，反映30元水平有阻力，而現價距離呢個阻力唔夠2元。
聶Sir續指，如果投資者有意買入，建議喺27元樓下入貨會比較安全，有貨嘅投資者可以睇多1個星期，如果股價升穿29元，可以考慮分段止賺離場。
