【Now財經台】截至早上11時止，過去1小時內《彭博》搜尋量最多港股，依次為國泰君安國際(01788)，美團(03690)，晶泰控股(02228)，比亞迪股份(01211)及江西銅業股份(00358)。
國泰君安國際宣布推出虛擬資產交易服務，客戶可以即時交易比特幣(Bitcoin)、以太幣(Ether)、雪崩幣(AVAX)等等，專業投資者更加可買美元掛鈎的穩定幣(Stablecoin)及泰達幣(Tether)，消息又掀起一波炒作，國泰君安國際股價今日(29日)一度飆15%，高見6.28元，現價price in晒呢個消息未？後市有冇機會上返6月高位，即7.07元以上水平？
大華繼顯執行董事梁偉源指，香港及美國與穩定幣有關嘅公司喺6月炒得好活躍，但成個8月都比較靜，主要係冇乜新進展，國泰君安國際喺呢個時候宣布推出虛擬資產交易服務，市場又再興奮及有一啲樂觀憧憬。
但佢認為，集團呢項新業務可以帶嚟幾多盈利都係未知之數，估計都唔會太大，相信股價今日反應咁大，係由一啲炒作資金推動，單純靠呢個消息要上返7元水平會比較難，因為市場早有預期。佢補充，9月底前本港申請穩定幣牌照方面可能有新進展，如果呢方面有新消息刺激，國泰君安國際股價先有機會突破7元關口。
